Joel 3
1ⲁⲩⲱ ⲥⲛⲁϣⲱⲡⲉ ⲙⲛⲛⲥⲁ ⲛⲁⲓ ϯⲛⲁⲡⲱϩⲧ ⲉⲃⲟⲗ ϩⲙ ⲡⲁⲡ︤ⲛ︦ⲁ︥ ⲉϫⲛ ⲥⲁⲣⲝ ⲛⲓⲙ ⲛⲥⲉⲡⲣⲟⲫⲏⲧⲉⲩⲉ ⲛϭⲓ ⲛⲉⲧⲛϣⲏⲣⲉ ⲙⲛ ⲛⲉⲧⲛϣⲉⲉⲣⲉ ⲁⲩⲱ ⲛⲉⲧⲛϩⲗⲗⲟ ⲥⲉⲛⲁⲡⲱⲱⲣⲉ ⲛϩⲉⲛⲣⲁⲥⲟⲩ ⲁⲩⲱ ⲛⲉⲧⲛϩⲣϣⲓⲣⲉ ⲥⲉⲛⲁⲛⲁⲩ ⲉϩⲉⲛϩⲟⲣⲁⲥⲓⲥ 2ⲛⲁⲕⲉϩⲙϩⲁⲗ ⲛϩⲟⲟⲩⲧ ⲙⲛ ⲛⲁⲕⲉϩⲙϩⲁⲗ ⲛⲥⲉϩⲓⲙⲉ ϩⲛ ⲛⲉϩⲟⲟⲩ ⲉⲧⲙⲙⲁⲩ ϯⲛⲁⲡⲱϩⲧ ⲉϫⲱⲟⲩ ⲉⲃⲟⲗ ϩⲙ ⲡⲁⲡ︤ⲛ︦ⲁ︥ ⲛⲥⲉⲡⲣⲟⲫⲏⲧⲉⲩⲉ 3ⲛⲧⲁϯ ⲛϩⲉⲛϣⲡⲏⲣⲉ ϩⲛ ⲧⲡⲉ ⲛⲧⲡⲉ ⲁⲩⲱ ϩⲉⲛⲙⲁⲉⲓⲛ ⲙⲡⲉⲥⲏⲧ ϩⲓϫⲙ ⲡⲕⲁϩ ⲉⲟⲩⲥⲛⲟϥ ⲙⲛ ⲟⲩⲕⲱϩⲧ ⲙⲛ ⲟⲩⲗϩⲱⲃ ⲛⲕⲁⲡⲛⲟⲥ 4ⲡⲣⲏ ⲛⲁⲕⲟⲧϥ ⲉⲩⲕⲁⲕⲉ ⲁⲩⲱ ⲡⲟⲟϩ ⲉⲩⲥⲛⲟϥ ⲉⲙⲡⲁⲧϥⲉⲓ ⲛϭⲓ ⲡⲛⲟϭ ⲛϩⲟⲟⲩ ⲙⲡϫⲟⲉⲓⲥ ⲉⲧⲟⲩⲱⲛϩ ⲉⲃⲟⲗ 5ⲁⲩⲱ ⲥⲛⲁϣⲱⲡⲉ ⲟⲩⲟⲛ ⲛⲓⲙ ⲉⲧⲛⲁⲉⲡⲓⲕⲁⲗⲉⲓ ⲙⲡⲣⲁⲛ ⲙⲡϫⲟⲉⲓⲥ ϥⲛⲁⲟⲩϫⲁⲓ ϫⲉ ϥⲛⲁϣⲱⲡⲉ ⲛϭⲓ ⲡⲉⲧⲛⲁⲟⲩϫⲁⲓ ϩⲙ ⲡⲧⲟⲟⲩ ⲛⲥⲉⲓⲱⲛ ⲁⲩⲱ ϩⲛ ⲑⲓ︤ⲗ︦ⲏ︦ⲙ︥ ⲉⲃⲟⲗ ϫⲉ ⲁ ⲡϫⲟⲉⲓⲥ ϫⲟⲟⲥ ⲁⲩⲱ ⲡⲉⲧⲉⲩⲁⲅⲅⲉⲗⲓⲍⲉ ⲛⲛⲉⲛⲧⲁ ⲡϫⲟⲉⲓⲥ ⲧⲁϩⲙⲟⲩ 6
Copyright information for
CopSahBible2